У Бабруйску знайшлі стыхійныя могілкі жывёлаў. Чаму нельга хаваць хатніх гадаванцаў у лесе?

У Бабруйску мясцовы жыхар знайшоў стыхійныя могілкі хатніх жывёлаў каля мікрараёна Заходні.

Чытайце таксама: Власти Пинска продолжают бороться с заброшенными зданиями, на этот раз задав «немало вопросов» их собственникам

Як піша Onliner, пахаванні знаходзяцца прыкладна за 100 метраў ад жылых дамоў.

На лясной ускраіне шмат магілаў з пластыкавымі і металічнымі агароджамі, вянкамі і кветкамі. На некаторых усталяваныя гранітныя помнікі і крыжы.

Бабруйчанін, які даслаў фота ў рэдакцыю, абурыўся тым, што лес паступова ператвараецца ў месца, дзе назапашваюцца пластык і іншыя штучныя матэрыялы. Замест таго каб ставіць агароджы і помнікі, мужчына прапанаваў саджаць на месцы пахавання дрэвы.

Падобныя неафіцыйныя могілкі ёсць і ў Магілёве. Адно з такіх месцаў знайшлі каля гаражнага масіву «Магілёўхімвалакна».

Што гаворыць закон пра пахаванне жывёлаў?

Парадак абыходжання з загінулымі жывёламі рэгулююць Закон Беларусі ад 2 ліпеня 2010 года № 161-З «Аб ветэрынарнай дзейнасці» і зацверджаныя пастановай Міністэрства сельскай гаспадаркі і харчавання ад 24 верасня 2012 года № 61 ветэрынарна-санітарныя правілы пахавання і знішчэння трупаў жывёлаў.

Згодна з артыкулам 24 Закона «Аб ветэрынарнай дзейнасці», утылізацыя, пахаванне і знішчэнне трупаў жывёлаў павінны адбывацца паводле ветэрынарна-санітарных правілаў. Такія дзеянні дазволеныя ў месцах, вызначаных мясцовымі выканаўчымі і распарадчымі органамі па ўзгадненні з дзяржаўнай ветэрынарнай службай.

Правілы, зацверджаныя пастановай № 61, забараняюць выкідваць трупы жывёлаў у вадаёмы, балоты, лясныя масівы і кантэйнеры для камунальных адходаў, а таксама вывозіць іх на палігоны і іншыя аб’екты, не прызначаныя для ўтылізацыі.

Пахаваць сабаку ці ката ў лесе, парку або ў іншым неўстаноўленым месцы нельга.

За парушэнне гэтых патрабаванняў паводле артыкула 16.28 КаАП пагражае адміністрацыйны штраф да 30 базавых велічынь — 1350 рублёў.

Адзін з законных спосабаў утылізацыі цела жывёлы — крэмацыя. Яна бывае індывідуальнай або агульнай. Пры індывідуальнай крэмацыі прах вяртаюць гаспадару ў спецыяльнай ёмістасці. Прах можна захоўваць дома ў спецыяльнай урне. Пры агульнай крэмацыі прах гаспадару не вяртаюць.

Іншы прадугледжаны варыянт — жывёльныя могільнікі і біятэрмічныя ямы. Яны прызначаныя для загінулай сельскагаспадарчай жывёлы.

Чым небяспечныя стыхійныя могілкі?

Пры раскладанні цела ў глебу трапляюць арганічныя рэчывы і прадукты распаду. Калі пахаванне зроблена ў непрыдатным месцы, яны могуць пранікаць у грунтавыя воды і забруджваць крыніцы вады. Рызыка залежыць ад складу глебы, глыбіні залягання грунтавых вод і аддаленасці ад калодзежаў і вадаёмаў.

Калі жывёла загінула ад інфекцыйнага захворвання, няправільнае абыходжанне з яе парэшткамі можа спрыяць распаўсюджванню ўзбуджальнікаў.

Праблемы ўзнікаюць і з ўжываннем пластыку: пластыкавыя агароджы, штучныя кветкі, вянкі і іншыя ўпрыгажэнні застаюцца ў лесе і паступова ператвараюцца ў смецце.

Куды звяртацца, калі жывёла загінула?

Калі памёр хатні ўлюбёнец, не варта самастойна закопваць яго ў лесе, парку або ў двары шматкватэрнага дома. Каб даведацца, як правільна арганізаваць утылізацыю, трэба звярнуцца ў дзяржаўную ветэрынарную службу або мясцовы выканкам. Там павінны падказаць, куды звярнуцца і які парадак дзейнічае ў канкрэтным населеным пункце.

Калі вы знайшлі загінулую жывёлу на вуліцы, у лесе або каля вадаёма, не чапайце яе голымі рукамі і не пераносіце самастойна. Пра знаходку можна паведаміць мясцовай ветэрынарнай службе або службе, якая адказвае за добраўпарадкаванне тэрыторыі. Калі ёсць падазрэнне на інфекцыйнае захворванне, пра гэта варта паведаміць як мага хутчэй.

Чытайце таксама: На радзіме Лукашэнкі каровы гінуць часцей, чым расце іх пагалоўе. Што адбываецца на Шклоўшчыне?

Наш канал в Telegram. Присоединяйтесь!

Есть о чем рассказать? Пишите в наш Telegram-бот. Это анонимно и быстро